Reto lector 2017

Para todas esas persoas ás que lles custa un chisco ler, para aquelas outras indecisas que nunca saben onde escoller, para aquelas que len só un determinado xénero e están abertas a máis posibilidades e,sobre todo, para as persoas aventureiras ás que lles gustan os desafíos… Para todas vai o noso Reto Lector 2017.

Con que obxectivo lanzamos o reto?

• Para lograr ler 24 libros nun ano.
• Para ampliar os xéneros e temáticas das nosas lecturas.
• Para participar dun desafío con máis persoas.
• Para coñecer os gustos doutros lectores e lectoras e, ao mesmo tempo, poder facerlles suxerencias.

En que vai consistir?

Dende a biblioteca faremos unha proposta de lectura para cada quincena de cada mes.

1. Para a primeira quincena escolleremos un reto obxectivo do que poder ofrecervos varias opcións. Teredes á vosa disposición unha selección de textos que se axusten á proposta ofrecida (por exemplo: libros escritos por autores/as premiados co Nobel de Literatura).
2. Para a segunda quincena a proposta será máis subxectiva e cada un e unha de vós deberá escoller a lectura cun criterio baseado na propia experiencia ou vivencias (por exemplo: o libro favorito do teu pai ou da túa nai).

A proposta para cada quincena publicarase nas nosas redes sociais Facebook e Twitter para que todos e todas podades seguir o reto incluso sen necesidade de vir á biblioteca. Ademáis, deste xeito poderedes comentar entre vos as vosas lecturas e establecer un diálogo que de seguro será moi enriquecedor.

Anímaste a seguir o reto? Séguenos na redes sociais e permanece atento/a para descubrir o primeiro dos retos, que será publicado o domingo 1 de xaneiro.