Os máis prestados Xullo-Setembro 2014

1. Legado en los huesos, de Dolores Redondo.
2. Sinsajo, de Suzanne Collins.
3. Regreso a tu piel, de Luz Gabás.
4. Un paso al frente, de Luis Gonzalo Segura de Oro-Pulido.
5. La mirada de los ángeles, de Camilla Läckberg.
6. Juego de tronos, de George R.R. Martin.
7. La noche soñada, de Màxim Huerta.
8. La lista de los nombres olvidados, de Kristin Harmel.
9. Palmeras en la nieve, de Luz Gabás.
10. Los cuerpos extraños, de Lorenzo Silva.

Legado en los huesos, a segunda novela de Dolores Redondo tras El guardián invisible, encabeza a lista dos libros máis solicitados durante o último trimestre na nosa biblioteca. Os dos títulos forman parte da Trilogía de Baztán, unha serie de misterio e intriga policíaca que se completará en novembro con Ofrenda a la tormenta.

A pesares de non ser unha novidade editorial, Sinsajo (terceira parte da saga Los juegos del hambre de Suzanne Collins) segue espertando interese entre os nosos lectores/as nestes momentos nos que está a piques de estrearse a súa adaptación cinematográfica.

O mesmo ocorre con Palmeras en la nieve, que ocupa o noveno posto. O gran éxito editorial de 2012 volta a estar de plena actualidade pola rodaxe da súa correspondente película, que contará, entre outros, co actor naronés Xavier Deive. A súa autora, a aragonesa Luz Gabás, ten a honra de ocupar tamén o terceiro posto co seu último libro Regreso a tu piel, que tantos/as de vos estades demandando.

No cuarto posto temos Un paso al frente, unha novela mediante a que o seu autor denuncia a corrupción no Exército español. O tenente Luis Gonzalo Segura foi expedientado e prendido por “facer manifestacións contrarias á disciplina, realizalas a través dos medios de comunicación social” e “emitir expresións contrarias, actos irrespetuosos e adoptar actitude de menosprecio contra mandos e autoridades militares” no contido da súa novela.

Camila Läckberg ten unha boa lexión de seguidores/as na nosa biblioteca que agardan con impaciencia a publicación de cada un dos seus libros. La mirada de los ángeles non ía ser excepción e é por iso que aparece no quinto lugar da lista dos máis solicitados.

E se a sueca ten seguidores, George R.R Martin non se queda atrás. A súa saga Canción de hielo y fuego inspirou unha das series de televisión máis vistas e comentadas dos últimos anos en todo o mundo. O primeiro libro da serie, Juego de Tronos, ocupa o sexto posto da nosa lista.

O televisivo Màxim Huerta acadou este ano o Premio Primavera de Narrativa coa súa cuarta novela, La noche soñada. É o sétimo libro máis demandado neste trimestre.

A Segunda Guerra Mundial é un tema moi presente na narrativa internacional dos nosos días. A estadounidense Kristin Harmel relata na súa novela La lista de los nombres olvidados unha historia que empeza coa ocupación nazi de París no ano 1942 e remata cunha volta ao pasado dende a actualidade.

E remata a clasificación Los cuerpos extraños, novela na que Lorenzo Silva recupera ao brigada Bevilacqua e á sarxento Chamorro para adentrarnos nunha nova intriga policíaca, tan esperada tamén polos seus moitos seguidores/as.