Campaña de recollida de libros e obradoiro de empaquetado

O Concello ten en marcha ata 21 de decembro unha campaña de recollida de xoguetes para as familias con escasos recursos. A recollida está xestionada polo Centro de Recursos Solidarios de Narón que se encargará, coa axuda de persoas voluntarias, de clasificalos e envolvelos para seren entregados ás familias o día antes de Reis. A biblioteca é un dos puntos de entrega de xoguetes usados.

Máis información da campaña neste enlace.

Paralelamente a Biblioteca de Narón organiza unha campaña de recollida de libros para que, ademais dos xoguetes, os nenos e nenas de Narón atopen na súa árbore de Nadal un conto infantil adaptado á súa idade.

Os libros poden entregarse ata o 19 de decembro na Biblioteca central do Alto de luns a venres de 9:30 a 13:30 e de 16:00 a 21:00 e sábados de 10:00 a 13:00.

Os contos donados, que deberán estar en perfecto estado e sen marcas, serán clasificados por idades polo persoal da biblioteca. O servizo organiza un obradoiro de empaquetado creativo para que as persoas maiores de 16 anos que así o desexen poidan participar envolvendo para agasallo estes contos. Este obradoiro levarase a cabo o martes 20 de decembro en dúas quendas:

  1) de 10:30 a 13:00.

  2) de 16:30 a 19:00.

Nestes intervalos horarios a chegada e a saída é libre e non será necesaria unha inscrición previa.