Día de Rosalía de Castro 2022

Jueves, 3 de Febrero de 2022

Lectura da obra de Rosalía de Castro

Ata o de agora conmemorabamos en Galicia o Día de Rosalía cada 24 de febreiro, data que se estimaba coma a do nacemento da nosa poeta máis internacional.

Tras a aparición de nova documentación que acredita que Rosalía de Castro naceu o 23 de febreiro de 1837, a Xunta acordou mudar a data de celebración do Día de Rosalía para este día.

A Biblioteca Pública Municipal de Narón súmase cada ano á proposta da Asociación de escritores e escritoras en lingua galega de celebrar esta data coa lectura pública da súa obra. Tradicionalmente organizabamos no sábado máis preto ao 24 de febreiro un acto no que nenos, nenas, mulleres e homes lían en público fragmentos da obra de Rosalía de Castro.

O pasado ano as restricións derivadas da situación sanitaria impedíronnos celebrar o Día de Rosalía como tradicionalmente viñamos facendo. Ante a imposibilidade de facelo coma sempre, xuntándonos para homenaxear á nosa poeta, reunímonos de maneira virtual.

Neste ano 2022 queremos repetir esta experiencia que tanto éxito tivo o pasado ano. É por iso que vos animamos a gravar un vídeo lendo un poema ou calquera fragmento da obra de Rosalía de Castro. Despois faremos unha composición que recolla todas as vosas participacións e que será publicada na nosa canle de Youtube.

 

Quen pode participar?

Persoas de todas as idades que queiran unirse á homenaxe.

Como facelo?

Elexide un poema ou calquera fragmento da obra de Rosalía de Castro e gravádevos léndoo.

Indicacións:

• Gravade o vídeo preferiblemente en horizontal.

• Intentade que non haxa moito ruido de fondo (tampoco poñades música na gravación).

• Elexide un poema ou fragmento curto para que o vídeo non sobrepase os 40 segundos de duración.

• Enviade o vídeo a biblioteca.central@naron.es entre o mércores 9 e o sábado 19 de febreiro (incluídos) indicando na mensaxe o nome da/s persoa/s participante/s.

 

O vídeo conxunto con todas as vosas participacións será publicado o mércores 23 de febreiro na nosa canle de Youtube e compartido nas nosas contas de Facebook, Twitter e Instagram.

Podedes ver o vídeo de 2021 premendo neste enlace: Día de Rosalía 2021.

 

 

Etiquetas: 
Día de Rosalía
lectura pública
Homenaxes
Biblioespazo 2022